Ermal Kutllovci, një zyrtar i Departamentit për Rezervë Shtetërore, ka bërë të ditur në një postim në Facebook se është larguar nga puna nga Ministria e Industrisë, Tregtisë dhe Ndërmarrësisë (MINT). Kutllovci kishte dalë në publik duke shprehur dyshime për dallavere në lidhje me procesin e furnizimit me produkte për Rezervën Shtetërore në vitin 2022.
Zoti Kutllovci është shprehur se largimi i tij ka ndodhur si rezultat i ngritjes së zërit kritik brenda institucionit në mbrojtje të ligjshmërisë. Ai ka theksuar se çdo reagim dhe kundërshtim i tij ka qenë i bazuar në Ligjin për Zyrtarët Publikë dhe Ligjin për Sinjalizimin.
Në postimin e tij, Kutllovci e akuzon Ministrinë e Industrisë, Tregtisë dhe Ndërmarrësisë për procesin e kundërligjshëm të furnizimit me produkte për Rezervën Shtetërore dhe ka përmendur se ka bërë paralajmërime të vazhdueshme në lidhje me këtë çështje, pa pranuar ndonjë shkresë zyrtare për t’iu përgjigjur shqetësimeve të tij.
Gjithashtu, Kutllovci ka hedhur akuza ndaj Ministrisë dhe ministres Rozeta Hajdari për ndalim të fjalës dhe tendencën për cenim të mendimit të lirë. Ai ka përshkruar një ngjarje, ku ministrja e ka kërcënuar hapur dhe ka kërkuar procedurën disiplinore kundër tij. Në vështrimin e tij, vendimi për largimin nga puna është cilësuar si një vendim arbitrar, i diktuar dhe i imponuar nga një presion i paparë politik. Ministria e Industrisë, Tregtisë dhe Ndërmarrësisë nuk e ka komentuar ende këtë çështje.
