Sinjalizuesi anonim ka dërguar një shkresë të detajuar në Agjencinë Kundër Korrupsionit (AKK), duke denoncuar shkelje ligjore dhe abuzime në Bankën Qendrore të Kosovës (BQK). Shkresa, e cila është dorëzuar me datë të caktuar, përshkruan me detaje keqpërdorime të ndryshme dhe punësime të dyshimta në institucionin financiar.
Në letër, sinjalizuesi shpreh shqetësimin e tij për abuzimet dhe shkeljet ligjore që, sipas tij, janë bërë dhe po vazhdojnë të bëhen në Bankën Qendrore të Republikës së Kosovës. Ai i drejtohet AKK-së me shpresën për hetimin e pretendimeve dhe parandalimin e vazhdimësisë së tyre.
Sinjalizuesi, i cili mbetet anonim, paraqet një listë të gjatë me mbi 70 persona të punësuar në BQK gjatë pesë vjetëve të fundit, duke theksuar lidhjet e tyre familjare dhe lidhjet e tyre me zyrtarë të institucioneve, partive politike, drejtuesve të BQK-së dhe personalitete të tjera. Gjithashtu, ai bën një thirrje për hetimin e shkarkimeve dhe suspendimeve të disa zyrtarëve brenda BQK-së, të cilat pretendon se kanë ndodhur kur ata nuk i kanë zbatuar “urdhrat” e eprorëve.
Në dokumentin 11-faqësh, sinjalizuesi prezanton edhe pretendimet për abuzime në tenderë gjatë viteve, revokime të licencave për institucione financiare dhe marrëveshje të dyshimta me kompanitë e sigurimeve, duke përfshirë detaje të tjera të lidhura me praktikat e dyshuara në BQK. Shkresa përfshin një apel drejt AKK-së për të ndërmarrë hetimet e nevojshme dhe ndërhyrjen për të parandaluar vazhdimin e këtyre shkeljeve.
